الكدب حرام

س:عاملة ايه مع زوجك؟
ص:يوووووه ده كل يوم خناق لا ف كلمة حلوة ولا حاجة

س:ليه يابنتى ده انتى بقالك شهرين بس متجوزة حرام عليكو كده

ص:جواز ايه وبتاع ايه يابختك انتى لسه ع البر انا بحسدك ع راحة البال
س:لا حول ولا قوة الا بالله ربنا يهدى سركم ويهديكم
------------------------------------------------------------------------

اللى قرأتوه ده ممكن يكون عادى وبنسمعه كل يوم من ناس نعرفها اللى مش واخدين بالنا منه بقى ان معظم الكلام دلوقتى بقى كده والردود ع اى سؤال الواحد بيساله للتانى بتبقى نفس الشكل كده انه ف مشاكل ومش مرتاح وكنتى فين يا لأ لما انا قلت اه وكله طبعا كدب ف كدب (الا من رحم ربى) سألت نفسى كتير اوى ليه الناس كده وبتنكد علينا وبتكرهنا ف اللى جاى وتخوفنا منه لأنى مش اول مرة يطلعلى واحدة تعقدنى م الجواز والمسئولية والبيت والاولاد طب ليه كده يا ناس وكانت الاجابة ف اعتقادى ف الكام سطر الجايين دول

السبب الاول :ان الواحد فعلا بيبقى مش مقدر حجم المسئولية اللى هو داخل عليها وشايف بس الموضوع من بره وده بقى ف اى حاجة خطوبة زواج شغل اى حاجة ودى اكبر غلطة لأن مش كل حاجة لونها بمبى وسهلة ف حاجات لازم نتعب عشان نوصلها او نرتاح فيها زى مثلا البنت اللى تبقى هاتموت وتتجوز ولما يحصل النصيب تقول كنتى فين يا لأ لما انا قلت اه :D

السبب التانى : دول بقى ناس مش ولا بد بيبقى فاكر ان اللى معاه مش مع غيره وهايتحسد ولو قال انه مبسوط كله هايقول يا بختك يا بختك اشمعنى انت وانا لا وبييجى ف عقل باله انه يكدب كدبة بيضا عشان يغزى العين (بالبلدى يعنى) النوع ده بكرهه جدااااااااا عشان قابلت كتير منهم ليه الواحد مش بيكتفى انه يقول الحمد لله بأبتسامة (ده حتى تبسمك فى وجه اخيك صدقة)


الظاهر الناس نسيت ان الكدب حرااام ايوه حرام ولا عشان اتعودنا نجامل ده ونخبى ع ده ونغير ف حقيقة ده يبقى الكدب أسلوب حياة الحمد لله بتريح اوى وبتقفل الباب قدام اى تساؤلات فضولية من اغلب الناس
مش لازم جو اريد حلا اللى كله بقى مفقوس
ياجماعة سهلوا الامور ماتعقدوهاش لنفسكم وتعقدوا غيركم فيها                                 

                                  خلص الكلام